A intención da Fundación é conseguir que nos mapas urbanos das cidades e vilas galegas se lembre a data do Día da Clase Obreira Galega, como acontece por exemplo coa ferrolá praza Dez de Marzo. No acto estarán o alcalde da vila, D. Melchor Roel Rivas, así como unha representación da F10M e de CC OO.

Xa ao mediodía, contra as 14:30 horas, no Restaurante Louzao (situado fronte á praia de Area) terá lugar a entrega dos Premios 10 de Marzo, cos que a F10M galardoa todos os anos unha serie de persoas que se destacaron polo seu compromiso en defensa dos dereitos das traballadoras e traballadores. As persoas que serán premiadas este ano son Isabel Pita, Ilda Aguiar, Antonio Dopico, Anselmo Hoyos e Manuel Landeira.

Apuntamentos biográficos

Isabel Pita Lamelas (delegada do Comité de Empresa de Hijos de Carlos Albo S. A. ata a súa xubilación) e Ilda Aguiar Lage (presidenta do Comité de Empresa de Hijos de Carlos Albo S. A.) son dúas traballadoras da conserva. En estreita colaboración, trataron de dignificar as condicións laborais no sector, ademais de reclamaren un tratamento de respecto como o de calquera traballador ou traballadora.

Antonio Dopio Dopico foi un traballador loitador e afectado polas folgas e loitas de 1972 en Ferrol. Cando o despediron tivo que marchar e recalou na Mariña, de onde é orixinaria a súa dona. Participou activamente nas primeiras folgas da construción na comarca, en particular as da empresa máis importante da zona, ALCOA (antigamente Alúmina-Aluminio), levando por toda a bisbarra as reivindicacións que CC OO propuña para os convenios colectivos de cada sector.

Anselmo Hoyos Sáiz naceu en Bilbao en 1929. Fillo de ferroviarios, desempeñou variadas ocupacións profesionais en Madrid logo da Guerra Civil. Emigrou a Francia a principios da década dos cincuenta, onde entrou en contacto co mundo sindical e co PCE, organización na que ingresou en 1951. En Galicia desempeñou tarefas organizativas, especialmente no mundo obreiro e estudantil ata 1968.

Media de votos